Scots
Walcome til the Scottish
Pairlament wabsite
The Scottish Pairlament is here for tae represent aw Scotland's
folk.
We want tae mak siccar that as mony folk as can is able tae find
oot aboot whit the Scottish Pairlament dis and whit wey it warks.
We hae producit information anent the Pairlament in a reenge o
different leids tae help ye tae find oot mair.
This section o wir wabsite introduces ye til the information that
is tae haun on wir wabsite in Scots.
Gettin involvit in the Scottish Pairlament
We hae producit a publication cried "Makkin Yer Voice Heard
in the Scottish Pairlament” that tells ye aboot the different
weys that you can let the Pairlament and the Memmers o the Scottish
Pairlament (MSPs) ken whit ye think.
Follae this link for tae look til the publication "Makkin Yer
Voice Heard in the Scottish Pairlament” in Scots.
Follae this link for tae look til the publication "Makkin
Yer Voice Heard in the Scottish Pairlament” in ither leids.
Gin ye wid like tae discuss whit wey we can help ye tae get involvit
in the darg o the Pairlament, please contact us.
Visitin the Scottish Pairlament in Edinburgh
You are walcome tae visit the Pairlament tae hae a keek roon or
find oot aboot whit wey the Pairlament warks.
Gin ye decide tae visit, please think on whit ye wid like tae see
and dae, as the biggin is gey popular and can get gey thrang:
- Gin it is important for ye tae see Pairlament at its darg,
ye’ll be wantin tae visit on a business day when ye’ll
can gang til the public galleries for tae watch a comatee meetin
or a meetin o the fu Pairlament in progress. It is aye better
tae book aheid for a gallery ticket. Tickets tae see Pairlament
in action
is free.
- Gin ye’re wantin tae see the biggin and learn mair
aboot the Pairlament in general, ye micht prefer a visit on a non-business
day when ye will can explore at yer leisure or enjoy a guidit tour
wi a professional tour guide (there a chairge for the guidit tour).
The Scottish Pairlament walcomes official visits fae folk fae Pairlaments
in ither countries and aw. Gin ye’re wantin tae arrange an
official visit for a group o folk fae anither Pairlament, please
request hit as faur aheid as possible. Normally, we’ll no can
arrange thir official visits while the Scottish Pairlament is in
recess or wi less nor sax weeks’ notice.
We want tae mak siccar that awbody is able tae visit the Scottish
Pairlament biggin. Wir premises is awready designit tae be as accessible
as possible. Hooanever, gin ye are disablit and hae ony specific
requirements, ye’re gey walcome tae contact us afore yer visit.
Follae this link for mair information anent visitin
the Pairlament biggin in Edinburgh.
Contactin the Scottish Pairlament
Gin ye wid like mair information anent the Scottish Pairlament,
ye can scrieve til us, in ony leid, by post, email or fax.
Wir contact details is:
Address:
The Scottish Pairlament
Edinburgh
EH99 1SP
Email: sp.info@scottish.pairlament .uk
Fax: 0131 348 5601
Forby yon, ye can telephone the Scottish Pairlament on 0845
278 1999 (or fae ootwith the UK dial +44 131 348 5000).
Hooanever, at present we can tak telephone and textphone caws
in English and Gaelic juist.
Forby yon, gin ye’re deif or speech impairit and a textphone
uiser, ye can contact the Pairlament 's textphone nummer. Yon
nummer is 0845 270 0152. Ye’re walcome tae contact us
uisin the RNID Typetalk service and aw. |
Contactin yer MSPs
Ye can scrieve til the Memmers o the Scottish Pairlament that has
been electit for tae represent ye. Their contact details can be foond
in the MSPs section o wir wabsite, although yon section o the wabsite
is in English by its lane.
Ither information producit by the Pairlament in Scots
Links tae ither documents producit by the Pairlament in Scots is
ablow: